كلاش بريس / الرباط
وزارة الداخلية كشفات على تفاصيل جديدة بخصوص الانتخابات ديال 2026، وخصوصاً الدعم اللي غايتعطا للشباب فالحملات الانتخابية.
الوزير عبد الوافي لفتيت قال البارح فمجلس النواب باللي المشروع الجديد غادي يشدد المراقبة على صرف هاد الدعم، خصوصاً عند المستقلين، وغادي يمنع أي واحد يتراجع على التزكية الحزبية أو يسحبها.
المشروع كيهتم بالشباب اللي ما كيتعداوش 35 عام، سواء عندهم حزب ولا لا، وغادي يعاونهم فمصاريف الحملات الانتخابية، لكن بشرط تكون الأمور واضحة ومثبتة فحساب بنكي خاص بالحملة، ومراقب من طرف خبير محاسب.
الدولة غادي تساهم حتى لـ75 فالمية من المصاريف اللي دارتها كل لائحة، ولكن ما يتجاوزوش 500 ألف درهم لكل مترشح.
لفتيت أوضح أن الهدف من هاد الدعم هو تشجيع الأحزاب باش يدمجو الشباب فالمؤسسات المنتخبة، وماشي باش يديرو “ريع انتخابي”.
وأكد أن أي لائحة مستقلة خاصها تقدم حسابها المالي للمجلس الأعلى للحسابات قبل ما تستافد من الدعم، حيت كيتعلق الأمر بمال عمومي، والدعم غادي يتحسب من المبالغ العامة اللي كتستافد منها الأحزاب فتمويل الحملات.
