كلاش بريس
فهاد الوقت اللي عايشين فيه، ولات كلمة “الزين والستيل” كتدور بزاف بين الناس، خاصة الشباب. ولات كتدل على واحد النوع ديال الناس اللي كيهمهم غير الشكل: اللبسة، الحذاء، تسريحة الشعر، وشنو كيبانو بيه فالصور والفيديوهات.
مواقع التواصل بحال تيك توك وإنستغرام زادت شعلات هاد الظاهرة. ولات الناس كتقلب غير على البوز، كيفاش تصور راسها، شنو تلبس، وفين تمشي. حتى اللي ماعندوش، كيقترض ولا كيصرف فوق طاقتو غير باش يبان “عندو الستيل”.
المشكل ماشي فالنظافة ولا فأن الواحد يهتم بنفسو، هاد الشي زوين، ولكن الخطير هو ملي كيولي المظهر أهم من العقل، من الأخلاق، ومن اللي كيحمل الإنسان فداخلو.
كاينين شباب كيتقلقو ويكتئبو حيث ماقدروش يكونو بحال اللي كيشوفو فالسوشيال ميديا. وبنات صغار كيبداو يفكرو فالتجميل وكيحسو بالنقص، غير باش يوصلو “للزين” اللي كيتشاف فالفيديوهات.
وحتى فالأحياء الفقيرة، ولات الموضة مسيطرة. شي ناس كيتخلاو على ضرورات الحياة غير باش يشريو تلفون غالي ولا سبرديلة ماركة. والهدف؟ غير باش يديرو بوز.
السؤال اللي كيبقى مطروح: واش المظهر ولى أهم من الشخصية والمعقول؟ واش غادي نبقاو نعيشو فهوس “الزين والستيل” ولا غادي نرجعو نهتمو أكثر بالمضمون والجوهر؟
.
